‘ဂီတ’ဆိုတဲ့ အနုပညာရေစီးကြောင်းထဲမှာ ဝါသနာတူ ဂီတသမားတွေရဲ့ ပေါင်းသင်းဆက်ဆံရေးတွေကိုလည်း တမ်းတလွမ်းဆွတ်နေတုန်းပဲလို့လည်း ပြောပြပါတယ်။

အနုပညာအလုပ်ကို ဂီတနဲ့စခဲ့ပေမဲ့ အပြောင်းအလဲပုံစံသစ်တွေ တည်ဆောက်ဖြစ်ခဲ့တာကတော့ အလုပ်နဲ့ ရှင်သန်လိုတဲ့စိတ်ကြောင့်လို့လည်း ဆိုပါတယ်။ “ဂီတသမားက ဘဝအစဆိုပေမဲ့ ခေတ်ရဲ့အပြောင်းအလဲနဲ့ ကိုယ်တိုင်လည်း အပြောင်းအလဲဖြစ်ချင်လို့ ဓာတ်ပုံအနုပညာဘက်ကို ရောက်ခဲ့ပြန်တယ်။ ပုံစံတစ်ခုတည်းမှာ ရှင်သန်ရတာထက် ရှင်သန်နိုင်သမျှ အလုပ်တွေကိုလည်း လုပ်ချင်တယ်။ အနုပညာဆို အများကြီးကျယ်ပြန့်တယ်။ ဓာတ်ပုံကနေ ဗီဒီယို၊ အဲဒီကနေ အခု ကြော်ငြာဒါရိုက်တာအထိ အနုပညာလမ်းကြောင်းထဲက မထွက်နိုင်သေးဘူး”

ဘယ်အချိန် ဘယ်အခါ ဘယ်နေရာပဲရောက်ရောက် ဘာတွေပဲလုပ်လုပ် ‘အောင်ကိုလတ်’ဆိုတဲ့ နာမည်ကတော့ ထင်ပေါ်ခဲ့တာချည်းပဲ။ အဲဒီအတွက် အလုပ်တွေအပေါ်မှာထားတဲ့ သဘောက သာမန်အတွေးမျိုး မဟုတ်ခဲ့ဘူး။ “ဘာပဲလုပ်လုပ် ကောင်းအောင်လုပ်ချင်တယ်။ မလုပ်ချင်တဲ့အလုပ်ကို အစကတည်းက လက်မခံဘူး။ ကိုယ်က တာဝန်ယူရတဲ့ အလုပ်ဆိုရင်လည်း ဘယ်နေရာပဲဖြစ်ဖြစ် အကောင်းဆုံးဖြစ်ချင်တယ်။ ဆိုလိုတာက ကိုယ်တတ်ထားခဲ့တဲ့ အခြေခံတွေကို ပြန်လုပ်ရမယ်ဆိုရင်လည်း မငြင်းဘူး။ ဥပမာ ဒါရိုက်တာတစ်ယောက်က ရုပ်ရှင်ဇာတ်ကားတစ်ကားမှာ ဓာတ်ပုံဆရာ လုပ်ရမယ်ဆိုရင်လည်း ကိုယ်လုပ်ချင်ရင် ဝင်လုပ်တာပဲ။ ငါက ဘာဖြစ်လို့ ဘာတော့မလုပ်နိုင်ဘူးဆိုတာမျိုး တွက်ကတ်မနေဘူး။ ဘယ်နေရာမှာ ဘာအဆင့်ပဲ လုပ်ရလုပ်ရ အကောင်းဆုံးလုပ်ပြချင်တယ်”