Select Month :   Go
No. 12, Volume 3, October 2009
Magazine Contents of this month
 
  Email :  
  Password :  
   Forget Password ?       Enter
တကယ်နော်ခက်သည့် အရွယ်တွေအကြောင်း
မေးခွန်းဖြစ်လာရတဲ့ ဖြစ်ကြောင်းကြောင့်
အရှေ့တိုင်း ဥရောပသို့တစ်ခေါက်
နတ်မတောင် သို့မဟုတ် ခေါနုသုမ်တောင်သို့ ခရီးသွားအမှတ်တရ
ခေါင်းဆောင်
အနက်များတဲ့ ကဗျာတစ်ပုဒ်
ဗ၈ျီ အောင်စိုးနှင့် မောင်မိုးသူ
မမြမေ၏ ပြောရေးဆိုခွင့်
စနေ ချစ်သူ
စိမ်းလန်းခြင်းပဲ့တင်
လမ်းများနဲ့ တို့တစ်တွေ
ဝိလုပ်ချင်သူများ
အမည်မဲ့ကမ္ဘာ
လိပ်ပြာမိမယ်
စုံည (Sunya)
အချစ်လမ်း
လေပါမှ နေသာတာ
တိကျကျ
လူပေါင်းမှားလို့
ကုန်အောင်သောက်ပေရော့
ဗ၈ျီ အောင်စိုးနှင့် မောင်မိုးသူ

ဗဂျီအောင်စိုးကို လူမသိခင်၊ မတွေ့ဖူးခင်ကပဲ သူရဲ့ လက်ရာပန်းချီပုံတွေကို နှစ်ခြိုက်စွဲလန်းခဲ့ရတယ်။ မောင်မိုးသူ ကိုအောင်စိုးကို ဘယ်တုန်းက ဘယ်လိုသိသည် မမှတ်မိပါ။ ကြာတာကတော့ အနှစ်လေးဆယ်ကျော်၊ ငါးဆယ်ရှိပြီပဲ၊ ကိုအောင်စိုး၊ မောင်မိုးသူတို့ခေတ် စာပေနဲ့ပန်းချီဆရာများကြားမှာ တော်ရုံတန်ရုံ အသက်ကွာခြား ပါကလည်း ဦးတပ်မခေါ်ဘဲ ကိုပဲ တပ်ခေါ်လေ့ရှိပါတယ်။ အားလုံးရဲ့ အသက်တွေကပဲ မကြီးသေးတာလည်း ပါနိုင်ပါတယ်။ ဒါကြောင့် တစ်သက်လုံး ဗဂျီအောင်စိုးကို ကိုအောင်စိုးလို့ ပြောဆိုရေးသားတာကို သိနားလည်နိုင်ကြမယ်လို့ မျှော်လင့်ပါတယ်။
ကိုအောင်စိုးရဲ့အိမ်ကို ပထမဦးဆုံး ရောက်ဖူးတုန်းက လမ်းမတော် သံဈေးနှင့် မျက်နှာချင်းဆိုင်က နှစ်ထပ်အိမ်၊ အပေါ်ထပ်မှာ ဖြစ်ပါတယ်။ ကိုအောင်စိုးရဲ့ ဇနီးက ဒေါ်အမာပါ။ ကိုအောင်စိုးက မောင်မိုးသူကို အမြဲပြောလေ့ ရှိတာကတော့ `မိုးသူ ငါ့မိန်းမနာမည်က အမာ၊ မင်းမိန်းမနာမည်ကလည်း အမာပဲ၊ ပြီးတော့ တို့နှစ်ယောက် မိန်းမကြောက်ရတာခြင်းလည်း တူတယ်က´ လို့ပြောလေ့ရှိပါတယ်။ ဒီစကားကိုကြားတဲ့ လူရင်း အနုပညာနယ် မိတ်ဆွေတွေက ဗဂျီ အောင်စိုးတို့ မောင်မိုးသူတို့က မိန်းမ ကြောက်ရလို့သာ တော်သေးတာပေါ့။ ကြောက်များမကြောက်ရရင် ဒုက္ခပဲလို့ ဆိုကြပါတယ်။ အဲဒီလို ပြောတိုင်း မောင်မိုးသူတို့က `ကျုပ်တို့က မိန်းမကိုရှေ့တင်ပဲ ကြောက်တာပါဗျာ၊ ကွယ်သွားရင် ဘယ်တော့မှ မကြောက်ပါဘူးလို့ ဖြေနေကျဖြစ်ပါတယ်။
တကယ်တမ်း ပြောရရင် ကိုအောင်စိုးရဲ့ ဒေါ်အမာ၊ မောင်မိုးသူရဲ့ ဇနီးမအမာတို့ဟာ လင်သားတွေရဲ့ အနုပညာက လွဲရင် ဘာမှမလုပ်ဘဲနေခဲ့ကြတာ၊ မိသားစုတာဝန်ကို ကျေပွန်အောင် မလုပ်ဆောင်ခဲ့ကြတာ၊ ပြီးတော့ အရက် သောက်ခဲ့ကြတာ စသည်ဖြင့် အတော်ကိုဆိုးတဲ့ဒဏ်တွေကို ခံခဲ့ကြရပါတယ်။
ဗဂျီအောင်စိုးကို မတွေ့ဘူးခင် ဗဂျီအောင်စိုးရဲ့ လက်ရာ၊ ပန်းချီပုံတွေကို မဂ္ဂဇင်းတွေထဲမှာ တွေ့ဖူး၊ ကြည့်ဖူး ပြီးသားပါ။ ဗဂျီအောင်စိုးဟာ အိန္ဒိယပြည် ရာဘင်ဒြာနတ်တဂိုးရဲ့ စန္တိနိကေတန်ကျောင်းမှာ သွားပြီး ပညာ သင်ယူဖူးပါတယ်။
တဂိုးရဲ့ကျောင်းဟာ သဘာဝကိုချစ်ရတဲ့ကျောင်း၊ စိတ်ကူးနှင့် ဖန်တီးမှုကို ဖွံ့ဖြိုးစေတဲ့ကျောင်း၊ ရိုးရာကို မြတ်နိုးစိတ်ဖြစ်သည်ထက် မြတ်နိုးဖြစ်အောင် လုပ်ဆောင် မွေးမြူတဲ့ကျောင်း ဖြစ်လေတော့ စန္တိနိကေတာကျောင်းက ပြန်လာတဲ့ ဗဂျအောင်စိုးရဲ့ လက်ရာတွေဟာ ခေတ်သစ်ရေးနည်းရေးဟန်တွေနဲ့ ရေးပေမဲ့ ရိုးရာ ကိုလည်းအမြဲပဲ ခေတ်သစ်ရေးဟန်တွေမှာ ပေါင်းစည်းထည့်ပြီး ရေးလေ့ရှိတာက ဗဂျီအောင်စိုးရဲ့ ထူးခြားတဲ့ ရေးဟန်ဖြစ်ပါတော့တယ်။ ဗဂျီအောင်စိုးရဲ့ လက်မှတ်လေးဟာ မြန်မာအမျိုးသမီးလေး တွေရဲ့ သနပ်ခါးပါးကွပ်ကလေးပါ။ အဲဒီ သနပ်ခါးပါးကွပ်ကလေးကို ဗဂျီအောင်စိုးက သူ့အမှတ်အသားအဖြစ် သေတပန်သက်အဆုံး အသုံးပြုသွားလေတော့ ခေတ်သစ်၊ ခေတ်ပေါ် ပန်းချီဆရာကြီးအောင်စိုးဟာ ရိုးရာမြန်မာမှုကို ဘယ်လောက် ချစ်မြတ်နိုးတယ် ဆိုတာက ထင်ရှားလှပါတော့တယ်။
ဗဂျီအောင်စိုး ရေးဆွဲတဲ့ မိုးတိမ်တွေဟာ သိပ်ပြီး နိမ့်လွန်းတယ်လို့ အညာသား၊ မန္တလေးသား၊ မောင်မိုးသူက ထင်မြင်ခဲ့ဖူးပါတယ်။ မန္တလေးမှာက မိုးတိမ်သားဆိုတာက ဟိုးအဝေးကြီး၊ အမြင့်ကြီး ကောင်းကင်ထက်မှာ ရှိနေတာလေ။ ဗဂျီအောင်စိုးရဲ့ မိုးတိမ်တွေကတော့ အိပြီးပိကျမလောက် နိမ့်နေတာကို မန္တလေးသား မောင်မိုးသူ ငယ်ငယ်က မကျေနပ်ခဲ့ပါဘူး။ နောက် ဆယ်တန်းလောက်မှာ ရန်ကုန်ရောက်လာတော့ လယ်ကွင်းကြီးတွေပေါ်မှာ အိပိပြီးပြိုကျမလို မြင်ရတဲ့ မိုးတိမ်ကို မြင်တော့မှ ဗဂျီအောင်စိုး ရေးတတ်လိုက်တာ၊ ကောင်းလိုက်တာဆိုပြီး ခံစားနိုင်ပါတော့တယ်။
ဗဂျီအောင်စိုးကို မောင်မိုးသူရဲ့ မိုးဦးပန်းစာပေတိုက်က ထုတ်ဝေတဲ့ ဒဂုန်တာရာရဲ` မေ´ ဝတ္ထု အဖုံးရေးဆွဲဖို့ အပ်ပါတယ်။ အဲဒီ အချိန်ကျတော့ ဗဂျီအောင်စိုးဟာ လမ်းမတော်အိမ်မှာ မဟုတ်တော့ဘူး။ ကျောက်မြောင်းမှာ နေတယ်။

ဗဂျီအောင်စိုးကလည်း `မေ´ ဝတ္ထုကို ဖတ်ဖူးပြီးသား၊ ကြိုက်ပြီးသားပါ။ မျက်နှာအဖုံးကို မိန်းကလေးတစ်ယောက် နှင်းဆီပန်းလေးကိုင်ပြီး ခပ်နွဲ့နွဲ့ပုံ ရေးမယ်ပေါ့။ အဲဒီမိန်းကလေးရဲ့ နောက်ခံအဖြစ်နဲ့ လမ်းမီးတိုင် (မန္တလေး အခေါ်ဓာတ်တိုင်)ကို ရေးမယ်လို့ ကိုအောင်စိုးက ပြောပါတယ်။ အဲဒီ ဓာတ်တိုင်ကလည်း စစ်မဖြစ်ခင် အင်္ဂလိပ်ခေတ်က ဓာတ်တိုင်မျိုး၊ မီးလုံးမျိုး လိုချင်တာရှိတာနဲ့ ကိုအောင်စိုးနှင့် မောင်မိုးသူ လိုက်ရှာရပါတယ်။

နောက်ဆုံးတော့ ၂၇ လမ်း၊ ၂၈ လမ်းလား မမှတ်မိတော့ပါဘူး။ လမ်းကြားလေးတစ်ခု မှာ အဲဒီလိုမျိုးဓာတ်တိုင်ကို တွေ့ရပြီး မျက်နှာဖုံးမိန်းကလေးရဲ့ နောက်ခံအဖြစ် ကိုအောင်စိုးက ရေးဆွဲပေးပါတယ်။ နောက်ကျောကျတော့ မောင်မိုးသူက အမျိုးသားနှင့် အမျိုးသမီးနှီးနှောနေပုံကို ခေတ်သစ်ရေးနည်းနှင့် ရေးပေးပါလို့ ကိုအောင်စိုးကို ပူဆာပါတယ်။ ဒီတော့ ကိုအောင်စိုးက `မင်းကတော့ ငါ့ကို ကြံကြံဖန်ဖန်ခိုင်းတယ်´လို့ ပြောပါတယ်။ ဒါပေမဲ့ တကယ်လည်း ရေးပေးခဲ့ပါတယ်။
ဗဂျီအောင်စိုးကို ပန်းချီပုံတော့ အဲဒီတစ်ခါပဲ အပ်ဖူးသလိုပဲ ရုပ်ရှင်လည်းတစ်ကားပဲ ရိုက်ဖူး ဆုံဖူးပါတယ်။

မောင်မိုးသူက မြှောက်ပေးတဲ့ သူက မြှောက်ပေးတာ နဲ့ ကောင်းဘွိုင်ဇာတ်လမ်းတစ်ခုကို `သေနတ်သမား´ ဆိုတဲ့ နာမည်နဲ့ ဇာတ်လမ်းလေးရေးပေါ့။ အဲဒီကားကို မောင်မိုးသူပဲ ဒါရိုက်တာလုပ်ပြီး ရိုက်ပါဆိုတာနဲ့ မင်းသားကြီး နေရာမှာ ဗိုလ်ဗကို မင်းသားငယ် နေရာမှာ ဝင်းမြင့်၊

လူကြမ်းတွေကတော့ အောင်စိုး၊ နေစိုးနဲ့ ဌေးဝင်း၊ မင်းသမီးကတော့ ချစ်စံပယ်နဲ့ ကေသီတို့ကိုရွေးပြီး ဗိုလ်ချုပ်ဈေးမြောက်ဘက်တန်း အပေါ်ထပ်မှာရှိတဲ့ ယုဆွေဓာတ်ပုံတိုက်မှာ ရုပ်ငြိမ်ပုံတွေ ရိုက်ခဲ့ပါတယ်။
`သေနတ်သမား´ဇာတ်ကားကို မောင်မိုးသူ ဒါရိုက်တာအဖြစ် မရိုက်ကူးဖြစ်ပေမဲ့ သူငယ်ချင်းဒါရိုက်တာ ကိုကိုလေးက `ရေပွတ်ပမာ´ဆိုတဲ့ နာမည်နဲ့ သူငယ်ချင်းနှစ်ယောက် ရိုက်ဖြစ်ခဲ့ကြပါတယ်။ မင်းသား၊ မင်းသမီး တွေကတော့ မြတ်လေး၊ ဇော်ခင်၊ ခင်သန်းနုတို့ဖြစ်ကြပေမဲ့ လူကြမ်းဇာတ်ရုပ်သုံးယောက်ဖြစ်တဲ့ အောင်စိုး၊ နေစိုးနဲ့ ဌေးဝင်းကိုတော့ မောင်မိုးသူကို ဆက်သုံးဖြစ်ပါတယ်။
`ရေပွက်ပမာ´ဇာတ်ကား ရိုက်ကူးခန်းမှာ အမှတ်တရဖြစ်စရာတွေ အများကြီးပါ၊ ကိုအောင် စိုးနဲ့ပက်သက်ပြီး ဖြစ်တာကတော့ ဒီလိုပါ။ From Here to Eternity ဇာတ်ကားထဲက ဇာတ်ဝင်ခန်း တစ်ခန်းကို ဒေးဗစ်(ကိုကိုလေး)နဲ့ မောင်မိုးသူတို့က သိပ်သဘောကျပါတယ်။ အဲဒီကတော့ အရက်ဘားကောင်တာမှာ ဓားမြှောင်နဲ့ ဘားနတ်စောဂနိုင်းကို မင်းသားဖြစ်တဲ့ ဘတ်တလန် ကစ္စတာက ကောင်တာပေါ်က ဘီယာပုလင်းကို ကောက်ကာ ခေါင်းကို ရိုက်ခန်း၊ ပုလင်းပြတ် အချွန်အတတ်တွေနဲ့ ရင်ဆိုင်ရတဲ့မြင်ကွင်း ဖြစ်ပါတယ်။
ကိုအောင်စိုးက ဓားမြှောင်ကိုင်ထားတဲ့ ရန်သူကိုစားပွဲပေါ်က ဘီယာပုလင်းကိုယူ စားပွဲပေါ်မှာ ရိုက်ပုံ၊ ပြီးတော့ ပုလင်းပြတ်အချွန်အတတ်များနဲ့ ရင်ဆိုင်ဖို့ ဖြစ်ပါတယ်။
ဟဲ..ဟဲ.. တကယ့်ကို အောင်စိုးက စားပွဲပေါ်မှ ဘီယာပုလင်းကို ရိုက်ချိုးလိုက်တော့ `ကွဲဘူးခင်ဗျာ´၊ နှစ်ကြိမ်သုံးကြိမ်ရိုက်လည်း မကွဲဘူး၊ ကွဲချင်ပြန်တော့လည်း ပုလင်းပြတ်က အချွန်အတတ် မပါပြန်ဘူး။ ဒါနဲ့ မောင်မိုးသူတို့ကလည်း ကြံမိကြရာ မှန်ကိုဖြတ်တဲ့ စိန်ရှာပြီး ဘီယာပုလင်းကို အချွန်အတတ်များရာထားပြီးမှ ကိုအောင်စိုးကို ခွဲစေပါတယ်။
ဟုတ်ကဲ့..ကွဲတော့ကွဲပါရဲ့ ပုလင်းပြတ်ကလည်း အချွန်အတတ်များရှိပါရဲ့။ ဘယ်က ဘယ်လိုဖြစ်သွားသလဲ မပြောတက်ပါဘူး။ ကိုအောင်စိုးလက်ကို ပုလင်းကွဲရှပြီး သွေးတွေ ထွက်လာပါတော့တယ်။ ကားရိုက်ရာမှာတော့ အဆင်ပြေပါတယ်။ ဒါပေမဲ့ ကိုအောင်စိုးက မင်းကြောင့် ငါ့လက် ပုလင်းကွဲရှသွားတာကွလို့ အပြစ်တင်ခြင်းခံရပါတယ်။
မောင်မိုးသူတို့ တက္ကသိုလ် ရုပ်ရှင်ထုတ်လုပ်ရေးက ကုန်ဈေးတန်း အောက်လမ်းမှာ ရှိပါတယ်။ အဲဒီရုံးခန်းမှာ မောင်မိုးသူနေပါတယ်။ အိပ်ပါတယ်။ ဒေးဗစ် (ဒါရိုက်တာကိုကိုလေး)ကတော့ အဲဒီကုန်ဈေးတန်း သုံးထပ်မှာ နေပါတယ်။ မောင်မိုးသူတို့ ကိုကိုလေးတို့ရဲ့ ညနေပိုင်းစုရပ်ဟာ ၂၄ လမ်းက အေအိုင်ဆိုတဲ့ ဗိသုကာ ရုံးခန်းမှာ ဖြစ်ပါတယ်။ ရုံးခန်းရဲ့ တကယ့်ပိုင်ရှင် သုံးယောက်ကတော့ ဗိသုကာ ဘိုကြီး၊ တင်ထွန်း နဲ့ အောင်ကြီးမြင့်ပါ။ ဒါပေမဲ့ ဗိသုကာအလုပ်မလုပ်ဘဲ ပန်းချီပဲဆွဲတဲ့ ခင်မောင်ရင်ကနေတယ်။ အဲဒီရုံးခန်းဟာ ပန်းချီရုံးခန်းလို ဖြစ်နေတာပေါ့။ အဲဒီလိုဖြစ်စေတဲ့ အကြောင်းအရင်းကတော့ မောင်မိုးသူ၊ ဒေးဗစ်တို့ရဲ့ သူငယ်ချင်း ပေါ်ဦး (ပေါ်ဦးသက်) လည်း ရောက်လာပြီး ပေါ်ဦးသက်၊ ခင်မောင်ရင်တို့ရဲ့ ပန်းချီခန်းဖြစ်သွားရတော့တာကို။
ဗဂျီအောင်စိုးက အဲဒီအေအိုင်ကို အမြဲလာအားပေး။ မန္တလေးက ဆရာဦးခင်မောင်(ဘဏ်)ကလည်း ရန်ကုန် ရောက်တိုင်း အဲဒီမှာပဲ နေကြတော့ ခေတ်သစ်ပန်းချီ၊ မော်ဒန်ပန်းချီ လောကကို ကိုယ်တိုင် မသိမမြင်ပေမဲ့ ထူထောင်ပြီးသား ဖြစ်သွားပါတော့တယ်။
ဗဂျီအောင်စိုးရဲ့ ပန်းချီလက်ရာ၊ ဗဂျီအောင်စိုးရဲ့ ရုပ်ရှင်သရုပ်ဆောင်မှုတွေနဲ့အတူတူ ဗဂျီအောင်စိုးရဲ့ အရက်အကြောင်းကလည်း ပြောမဆုံးပေါင်၊ တောသုံးတောင်ပါပဲ။
ကိုအောင်စိုးက အရက်သောက်ရင် ဆိုးပါတယ်။ မောင်မိုးသူလည်း ရေရေလည်လည် ခံရဖူးပါတယ်။ ဖြစ်ပုံက ဒီလိုပါ။
ရှေ့လ ဆက်ဖတ်ပါ။
မောင်မိုးသူ