Select Month :   Go
No. 12, Volume 3, October 2009
Magazine Contents of this month
 
  Email :  
  Password :  
   Forget Password ?       Enter
တကယ်နော်ခက်သည့် အရွယ်တွေအကြောင်း
မေးခွန်းဖြစ်လာရတဲ့ ဖြစ်ကြောင်းကြောင့်
အရှေ့တိုင်း ဥရောပသို့တစ်ခေါက်
နတ်မတောင် သို့မဟုတ် ခေါနုသုမ်တောင်သို့ ခရီးသွားအမှတ်တရ
ခေါင်းဆောင်
အနက်များတဲ့ ကဗျာတစ်ပုဒ်
ဗ၈ျီ အောင်စိုးနှင့် မောင်မိုးသူ
မမြမေ၏ ပြောရေးဆိုခွင့်
စနေ ချစ်သူ
စိမ်းလန်းခြင်းပဲ့တင်
လမ်းများနဲ့ တို့တစ်တွေ
ဝိလုပ်ချင်သူများ
အမည်မဲ့ကမ္ဘာ
လိပ်ပြာမိမယ်
စုံည (Sunya)
အချစ်လမ်း
လေပါမှ နေသာတာ
တိကျကျ
လူပေါင်းမှားလို့
ကုန်အောင်သောက်ပေရော့
အရှေ့တိုင်း ဥရောပသို့တစ်ခေါက်

ကျွန်မ ခရီးသွားဆောင်းပါးတွေ ဖတ်ရတာ သဘောကျပါတယ်။ မဂ္ဂဇင်းစာအုပ်ငှားဖတ်တဲ့အခါ ခရီးသွား ဆောင်းပါးပါလို့ကတော့ အဲဒါကို အရင်ဆုံး ဖတ်တော့တာပဲ။ အထူးသဖြင့် ပါမောက္ခဒေါက်တာခင်မောင်ဝင်း(အသည်း)နဲ့ ဆရာမ မေတ္တာဦးရဲ့ ပြည်ပခရီးအတွေ့အကြုံတွေက စိတ်ဝင်စားစရာကောင်းသလို ဗဟုသုတတွေပါရတယ်။ နိုင်ငံ တစ်နိုင်ငံနဲ့ တစ်နိုင်ငံ၊ လူမျိုး တစ်မျိုးနဲ့တစ်မျိုး ယဉ်ကျေးမှု၊ ဓလေ့စရိုက်တွေ က မတူလေတော့ ခရီးသွားဆောင်းပါး တွေဖတ်ရတဲ့အခါ ကိုယ့်နိုင်ငံ၊ ကိုယ့်လူမျိုးနဲ့ ယှဉ်ပြီး ဘယ်အရာကတော့ ကျွန်မတို့ မြန်မာတွေကသာတယ်၊ ဘယ်အရာကိုတော့ ကျွန်မတို့က အတုယူသင့်တယ်ဆိုပြီး တွေးတာပေါ့လေ။ နောက်တစ်ခုက ကိုယ်က နိုင်ငံစုံရောက်နိုင်ဖို့ မလွယ်ဘူး။ အချိန်နဲ့ ငွေအကုန်ခံနိုင်ပါမှ။ အခုလို စီးပွားရေး ကျပ်တည်းမှုတွေ ကြုံရတဲ့အခြေအနေမှာ နိုင်ငံခြား ရောက်ခဲ့တဲ့သူတွေရဲ့အတွေ့အကြုံတွေ ရေးပြတာ ဖတ်ရတာ ကျွန်မအတွက်တော့ ပိုက်ဆံမကုန်ဘဲ နိုင်ငံစုံ ရောက်ရတယ် ပေါ့။ ကိုယ်မသိသေးတဲ့နိုင်ငံရပ်ခြားအတွေ့အကြုံတွေကို သုံးလေးရာကုန်လိုက်ရုံနဲ့ ရပြီလေ။ (မဂ္ဂဇင်းငှားဖတ်ခကို ပြောတာပါ)
 
အခုတော့ မထင်မှတ်ဘဲ ကျွန်မကိုယ်တိုင် အရှေ့ဖျားနိုင်ငံဖြစ်တဲ့ မကာအိုကို Web Journalism Workshop နဲ့ Asia Media Summit တက်ဖို့အတွက် သွားခွင့်ကြုံတယ်။ မကာအိုကို ကြားတဲ့သူတွေက အိန္ဒိယလို့ ထင်ကြတယ်။ မကာအိုက တရုတ်ပြည်သူ့သမ္မတနိုင်ငံရဲ့ ကျွန်းမြို့လေးတစ်မြို့ပါ။ ပေါ်တူဂီတွေ နှစ်ပေါင်းများစွာ အုပ်ချုပ်ခဲ့ပြီး ၁၉၉၆ ခုနှစ်ကမှ လွတ်လပ်ရေးရခဲ့ပါတယ်။
ဒါကြောင့် မကာအိုမှာ အရှေ့နဲ့အနောက် ယဉ်ကျေးမှုတွေ ရောပြွမ်းနေတယ်။ တရုတ်နဲ့ ပေါ်တူဂီ စကားကို ရုံးသုံးစကား အဖြစ်ထားပြီး ပေါ်တူဂီစာနဲ့ စကားတတ်တဲ့သူက မကာအိုရဲ့ အစိုးရရုံးတွေမှာ အလုပ်အကိုင် အခွင့်အလမ်းကောင်းကောင်း နဲ့ ရာထူးကောင်းကောင်းတွေ ရကြတယ်။
ကျွန်မသွားတဲ့အချိန်က မေလဆိုတော့ တစ်ခါတစ်ရံ မိုးတစ်ပေါက် နှစ်ပေါက်ရွာရုံကလွဲလို့ ရာသီဥတု သာယာတယ်။ မသွားခင် အင်တာနက်ကနေ မကာအိုအကြောင်း ဖတ်ထားတော့ အနွေးထည်ပါးပါးတစ်ထည်၊ နှစ်ထည်လောက်ပဲ ယူသွားလိုက်တယ်။ တစ်ယောက်တည်းသွားရမယ့် ခရီးဖြစ်တဲ့အပြင် ပထမဆုံးပြည်ပခရီးမို့လို့ အင်တာနက်ကနေ သွားရေးလာရေးကိစ္စ၊ ငွေလဲလှယ်နှုန်း၊ အသက်မွေးဝမ်းကြောင်း လုပ်ငန်းတွေကအစ လေ့လာ ထားလိုက်တယ်။ ဒီနေရာမှာ သတိရလို့ ပြောချင်တာကတော့ အင်တာနက်ဟာ အများလက်ခံသလို တကယ့် စွယ်စုံကျမ်းကြီးပါပဲ။ ဒါပေမဲ့ အင်တာနက်မှာ အယ်ဒီတာဆိုတာ မရှိတော့ အင်တာနက်ထဲက အရာမှန်သမျှ အားလုံးအမှန် တွေချည်းပဲလို့ သတ်မှတ်လို့ မရဘူး။ ရန်ကုန်အကြောင်း ရန်ကုန်ရောက်ဖူးတဲ့ သူကပြောတာနဲ့ ကိုယ်ကိုယ်တိုင် ရန်ကုန်သွားတဲ့အခါ ကြုံတွေ့ရတဲ့အတွေ့အကြုံ၊ အဖြစ်အပျက်တွေက မတူနိုင်ဘူးလေ။
ခုတော့ ကိုယ်တွေ့ကြုံနေရပါပြီ။ ကျွန်မသွားတဲ့နေ့က မကာအို လေယာဉ်မရှိလို့ ထိုင်းလေဆိပ်မှာ တစ်ညအိပ်ရပါတယ်။ လေဆိပ်ကြီးက ကြီးမားကျယ်ဝန်းလွန်းလို့ အံ့ဩမိပေမဲ့ မြားပြထားတဲ့အတိုင်း ဆက်လျှောက် သွားလိုက်တယ်။ ကိုယ့်မှာက မဖြစ်မနေသယ်လာရတဲ့ Laptop ခပ်လေးလေး တစ်ခု၊ တိုလီမိုလီထည့်ထားတဲ့ ကျောပိုးအိတ်က တစ်လုံး၊ ဒေါ်လာ အနည်း အကျဉ်းပါတဲ့ပိုက်ဆံအိတ်က တစ်အိတ်နဲ့ အေးစက်နေတဲ့ လေဆိပ်ကြီးထဲမှာ ချွေးပြန်နေတုန်း အသက် ၂၅ နှစ် အရွယ် မိန်းကလေးတစ်ဦး အပြေး လိုက်လာပြီး ‘အစ်မက မြန်မာ မဟုတ်လား၊ ဘယ်သွားမှာလဲ’ လို့ မေးတယ်။ သူက ‘ဂျာမနီကို ဒီည ၁၁းဝ၀ နာရီလေယာဉ်နဲ့ ဆက်သွားရမှာ ဘယ်ကိုသွားရမလဲ’ လို့ စိုးရိမ်တကြီး မေးပါလေရော။ ကျွန်မက ‘မကာအိုကို မနက် ၇းဝ၀ နာရီ လေယာဉ်နဲ့သွားရမှာ။
လေဆိပ်ဝန်ထမ်းတွေကို မေးလိုက်ပါလား’လို့ အကြံပေးလိုက်ပါတယ်။ ခရီးသွားဆောင်းပါးတွေ ကြိုက်တဲ့သူက ခုတော့ ခရီးတစ်ခုကိုရောက်ဖို့ ကိုယ်တိုင်ရင်ခုန်နေရတဲ့အပြင် သူများနဲ့ပါ ရင်ခုန်ခြင်းတွေ မျှဝေနေရပြီ။
ချော         -   I’m going to Macau at 7 o’clock tomorrow morning so where can I Stay tonight.
ဝန်ထမ်း    -   You can stay wherever you like. You can check the schedule of Macau and terminal on that board at the 3 AM.
လေဆိပ်ဝန်ထမ်းက အနီးက ဘုတ်ကို ညွှန်ပြပါတယ်။ ကြည့်လိုက်တော့ ခုံတန်းတွေပေါ်မှာ အသားအရောင်ကွဲပြားတဲ့သူတွေ... ကမ္ဘာကြီးတစ်ခုတည်းက လူသားတွေ စိတ်အေးလက်အေးပဲ နေနေကြတယ်။ ကျွန်မလည်း မောမောနဲ့ အစွန်ကျတဲ့ခုံတန်းရှည်တစ်ခု ကိုရွေးပြီး ထိုင်လိုက်တယ်။ ကြည့်ပါဦး၊ အချိန်တိုလေး အတွင်းမှာ မြန်မာပြည်ကို ဖောက်ထွက်ပြီး ထိုင်းနိုင်ငံကို ရောက်ခဲ့ပြီ။ နောက်တစ်ရက်မှာ မကာအိုကို ရောက်မယ်။ မိုင်ပေါင်းများစွာ ဝေးတဲ့ခရီးတွေကို နီးနီးလေး ဖြစ်သွားအောင် လေယာဉ်ပျံတွေ တီထွင်နိုင်ခဲ့တာ အံ့ဩစရာပါပဲ။ အခုဆိုရင် ကမ္ဘာကြီးကို ဖောက်ထွက်နိုင်တဲ့ ဒုံးပျံတွေ တီထွင်ပြီး အာကာသကို ခရီးဆန့်ကြပြန်ပြီ။ ဒါပြီးရင် ဘာတွေ ရှေ့ဆက်ဖောက်ထွက်ဦးမလဲမသိဘူး။ ခရီးသွားချင်နေတဲ့သူအတွက် ခရီး ကတော့ ဆုံးမှာ မဟုတ်ဘူး။
ကျွန်မ ခံစားချက်ကတော့ ကမ္ဘာကြီးကို ဖောက်ထွက်နိုင်ဖို့ထက် လူတွေဟာ မိမိတို့ရဲ့ အတ္တဥခွံထဲက ဖောက်ထွက်နိုင်ဖို့ ပိုပြီးအရေးကြီးတယ်ဆိုတာပါပဲ။
လေဆိပ်က TAIPA ကျွန်းမှာရှိတဲ့အတွက် တည်းခိုမယ့် မကာအိုမြို့က ဟိုတယ်သင်တန်းကျောင်းကို Taxi နဲ့ ဆက်သွား ရပါတယ်။ IFT လို့ခေါ်တဲ့ Institute for Tourism Studies ကျောင်းက အစိုးရ ဟိုတယ်သင်တန်းကျောင်းတစ်ခုပါ။ ဟိုတယ်တစ်ခုရဲ့ ဝန်ဆောင်မှုအပြည့်ရှိပြီး ဝန်ထမ်းတွေက သင်တန်းလာတက်တဲ့ သင်တန်းသားတွေပါ။ သူတို့က အခမဲ့တာဝန်ထမ်းဆောင်ကြတာပါ။ IFT သင်တန်းကျောင်းလေးက တောင်ကုန်းလေးပေါ်မှာရှိပြီး သစ်ပင်လေး တွေ စိမ်းစိုနေပုံက တောင်ကြီးမြို့နဲ့ ခပ်ဆင်ဆင်ပါ။
လေယာဉ်လွတ်မှာ စိုးရိမ်ပြီး တစ်ညလုံး မအိပ်ခဲ့ရတဲ့အတွက် ပတ်ဝန်းကျင်အလှအပကို ကြာကြာမခံစားနိုင်ဘဲ အားရပါးရ အိပ်လိုက်တော့တယ်။
Web Journalism Workshop က တနင်္လာနေ့ကနေ သာကြာ နေ့အထိ မနက် ၉းဝ၀ နာရီကနေ ညနေ ၄း၃၀ နာရီအထိပါ။ မြန်မာနိုင်ငံက ကျွန်မအပါအဝင် နိုင်ငံပေါင်း ၈ နိုင်ငံက သင်တန်းသား ၉ ဦး တက်ရပါတယ်။ သင်တန်းဆရာတွေက ဂျာမနီနိုင်ငံသားတွေပါ။ နိုင်ငံတကာမှာ Online က အရမ်းဖွံ့ဖြိုးလာတော့ Online Journalism အကြောင်းနဲ့ Online Journalism တွေရဲ့တာဝန်ဝတ္တရားတွေ၊ Online ဆောင်းပါးရေးသားနည်းတွေကို ဆွေးနွေးကြမှာပါ။ သင်တန်း ၃ ပတ်ပြီးရင်တော့ တစ်နှစ် တစ်ကြိမ်ကျင်းပတဲ့ Asia Media Summit ကို ၄ ရက် ဆက်တက်ရပါမယ်။
မီဒီယာလုပ်ငန်းမှာ အလုပ်လုပ်နေတဲ့ ကျွန်မကို ဒီ Workshop နဲ့ Summit တွေက အတွေ့အကြုံတွေ အများကြီး ရစေပါတယ်။ Online Journalism နဲ့ Asia Media Summit အတွေ့အကြုံတွေကို သီးသန့်ရေးပါဦးမယ်။ ခုဆောင်းပါးမှာတော့ မကာအိုရဲ့ စိတ်ဝင်စားဖွယ်နေရာ ၁၀ ခုလို့ သတ်မှတ်ထားတဲ့ Tourist Attraction နေရာတွေကို ဖော်ပြပေးလိုက်ပါတယ်။
အာမားဘုရားကျောင်း(A-Ma Temple)

မကာအိုမြို့ရယ်လို့ မဖြစ်လာခင်ကတည်းက အာမားဘုရား ကျောင်းက ရှိနေပြီးသားပါ။ အဲဒီထဲမှာ အမျိုးမျိုးသော ရိုးရာယုံကြည်မှု တွေအတွက် ကိုယ်စားပြုရည်မှန်းပြီး ကန်တော့နိုင်တဲ့နေရာတွေ ရှိပါတယ်။

ဆီနားဒိုး စကွဲ(Senado Square)

မကာအိုရဲ့မြို့လယ်မှာ ရာစုနှစ်ပေါင်းများစွာကတည်းက တည်ရှိ ခဲ့တာပါ။ အခုချိန်ထိလည်း ပွဲလမ်းသဘင်ကျင်းပရာ လူထုလှုပ်ရှားမှုတွေ လုပ်တဲ့ ရေပန်းအစားဆုံးနေရာတစ်ခုပါ။ လွှတ်တော်အဆောက်အဦ ဟောင်းနားမှာရှိတဲ့ အဲဒီ Square ကို အရောင်နုတွေနဲ့ မွမ်းမံထားတဲ့ ခေတ်သစ်အရိပ်အငွေ့တွေ တွေ့ရပါတယ်။
စိန်ပေါလ်ကျောင်းပျက်ကြီး (Ruins of Stipule’s)

ဒီကျောင်းရဲ့အပြင်ပန်းမျက်နှာစာက Church of Mater Dei အဆောက်အဦ ပုံစံယူထားတာပါ။ ကြွင်းကျန်ရစ်တဲ့အဆောက်အဦကို တော့စိန်ပေါလ်ကောလိပ်အဖြစ် ထားရှိပြီး အရှေ့တိုင်းမှာရှိတဲ့ ပထမဦးဆုံး အနောက်တိုင်းဟန် တက္ကသိုလ်တစ်ခုဖြစ်ပါတယ်။ စိန်ပေါလ်ရဲ့ အကြွင်းအကျန်အဆောက်အဦ မျက်နှာစာကတော့ မကာအိုမြို့ရဲ့ ယဇ်ပလ္လင် တစ်ခုအသွင် ဆောင်နေပါတယ်။

တောင်ကုန်းခံတပ်နဲ့ မကာအိုပြတိုက်(Mount Fortress & Museum of Macau)

စိန်ပေါလ်နဲ့ တစ်ပြိုင်တည်းမှာပဲ ခရစ်ယာန်တွေက သူတို့ရဲ့ ရုံးချုပ်အဖြစ် ဆောက်ခဲ့ပြီး ရည်ရွယ်ချက်ကတော့ ၁၆၂၄ ခုနှစ်မှာ ကျူးကျော်လာတဲ့ဒတ်ခ်ျတွေကို တော်လှန်ဖို့ပါ။ နောက်ပိုင်းမှာတော့ ဘုရင်ခံအိမ်ဖြစ်သွားပြီး ဒီဘက်ခေတ် ရောက်တဲ့အခါ မကာအိုပြတိုက် ဖြစ်သွားပါတော့တယ်။ ပြတိုက်အတွင်း ပွဲလမ်း သဘင်၊ လူမှုဓလေ့ ထုံးတမ်း၊ ဗိသုကာလက်ရာ၊ အားကစားပြိုင်ပွဲ၊ ပန်းချီပြိုင်ပွဲနဲ့ ဒေသ ဟင်းလျာ အချက်အပြုတ်ပြိုင်ပွဲတွေ ကျင်းပကြပါတယ်။
မကာအိုမျှော်စင်(Macau Tower)

၂၀ဝ၁ ခုနှစ် ဒီဇင်ဘာ ၁၉ ရက်က ဖွင့်လှစ်ခဲ့တဲ့ ဒီမျှော်စင်ကြီးဟာ ၃၃၈ မီတာ ရှိပြီး ၁၀ ခုမြောက် ကမ္ဘာ့အမြင့်ဆုံး မျှော်စင်ကြီး ဖြစ်ပါတယ်။ ပုလဲမြစ်ဝ ကျွန်းပေါ်ဒေသအများစုနဲ့ မကာအိုတစ်မြို့လုံး ကို မြင်နိုင်ပြီး ၂၁၆ မီတာအမြင့်မှာ

စားသောက်ဆိုင်တွေ ရှိပါတယ်။ မျှော်စင်ရဲ့အပြင်ဘက်မှာ “Skywalk” ရှိပြီး အဲဒီအတွက် ကျသင့်ငွေက mop ၂၂၀ ပါ။ (US$ 1=7078 mop ဖြစ်ပါတယ်)
ကွမ်ရင်ဘုရားကျောင်း(Kun Lam Temple)

နတ်သမီးတွေကို ကိုယ်စားပြုလုပ်ထားတဲ့ ဒီဘုရားကျောင်းကို ၁၅ ရာစု ကစပြီး ဘာသာရေးလုပ်သူတွေက ရက်ရက်ရောရော ငွေပဒေသာပင် စိုက်ထူကြပါတယ်။ ဘာသာရေးနဲ့ ဆိုင်တဲ့ ရုပ်တုတွေ၊ ပန်းချီကားတွေ၊ ဆုတောင်းခန်းမ နဲ့ ဈာပနခန်းမဆောင်တွေ ရှိပါတယ်။

Kun Lam Statue

မကာအိုရဲ့ရေပန်းစားတဲ့ အမှတ်အသားမျှော်စင်ဖြစ်ပြီး အနားယူနိုင်သလို တရားထိုင်လို့လည်း ရပါတယ်။ ပေါ်တူဂီတွေရဲ့လက်ရာဖြစ်လို့ ကွမ်ရင်ဆိုပေမဲ့ အနောက်တိုင်းကွမ်ရင်လို့ တင်စားကြတယ်။ ကမ်းနားလမ်းမှာတော့ အပန်းဖြေ အနားယူတဲ့ လူတွေအတွက် အမျိုးမျိုးသော ဂီတ ဖျော်ဖြေမှုတွေ၊ စားသောက်ဆိုင် တွေ ရှိပါတယ်။

   
လောင်းကစားရုံများ(Casinos Gambling)
မကာအိုရဲ့ အဓိကစီးပွားရေးလုပ်ငန်းကတော့ လောင်းကစားပါ။ တိုင်ပါနဲ့ မကာအိုမှာ လောင်းကစားရုံတွေ အများကြီးရှိပြီး အင်မတန် ကြေးကြီးတဲ့လောင်းကစားဝိုင်းတွေပါ။ ဖိတ်ဖိတ်တောက်နေတဲ့ ငွေ အကြွေစေ့ထည့် လောင်းကစားစက်တွေကလည်း နေရာတိုင်း ရှိနေပါတယ်။ မကာအိုမှာရှိတဲ့ လောင်းကစားရုံတွေက ၂၄ နာရီ ဖွင့်ပါတယ်။ သူတို့သတ်မှတ်ထားတဲ့ စည်းကမ်းချက်တွေတော့ ရှိပါတယ်။ ၁၈ နှစ် အောက် မဝင်ရ။ ဖိနပ်ပါးမစီးရ။ (လူကြီးလူကောင်းစတိုင်လ် ဝတ်စားရမယ်လို့ ဆိုလိုတာပါ)။ ဦးထုပ်လည်း မဆောင်းရပါဘူး။ ကျွန်မကတော့ နိုင်ငံတကာက တကူးတက လာကစားတဲ့သူတွေကိုကြည့်ပြီး သူတို့ရဲ့ ပန်းတိုင်က ဘာပါလိမ့်လို့ တွေးမိတယ်။ မကာအိုမှာ ပညာတတ် မျိုးဆက်ပြတ်သလို ဖြစ်နေပါတယ်။ ကျောင်းသားအရွယ်လေးတွေဟာ ပညာဆက်မသင်တော့ဘဲ လောင်းကစားရုံတွေမှာ အလုပ်ဝင်ကြပါတယ်။ ဘွဲ့ရ၊ ပညာတတ်ဖြစ်လို့ ရတဲ့ဝင်ငွေနဲ့ လောင်းကစားရုံတွေမှာ ဝန်ထမ်းလုပ်လို့ရတဲ့ ဝင်ငွေချင်းက အရမ်းကွာတော့ ပညာရေးကို အချိန်မပေးချင်ကြတော့ဘူးလေ။ လောင်းကစားရုံထဲမှာ ဓာတ်ပုံ ရိုက်ခွင့်မရှိတဲ့အတွက် အပြင်ဘက်မှာပဲ ရိုက်ခဲ့ပါတယ်။
ဟာဆာကမ်းခြေ(Hac-Sa Beach)

ဟာဆာကမ်းခြေဟာ Coloane ကျွန်းမှာရှိပြီး အဲဒီမှာရှိတဲ့ ကမ်းခြေထဲမှာ အရှည်ဆုံးကမ်းခြေဖြစ်ပါတယ်။ လေတိုက်တဲ့အတွက် ရွက်လှေစီးလို့ရတယ်။ ရေပြင်ပေါ် စီးလို့ရတဲ့ ဆိုင်ကယ်တွေရှိတယ်။ ကမ်းခြေအနီးမှာ တင်းနစ်ကွင်းတွေ၊ ရေကူးကန်တွေ၊ ပျော်ပွဲစား ထွက်ဖို့ နေရာတွေနဲ့ ကလေးကစားကွင်းတွေ ရှိတယ်။ တရုတ် စားသောက်ဆိုင်တွေရှိပြီး ဈေးကတော့ အရမ်းကြီးတယ်။
Fishermen’s Wharf

မကာအိုမြို့ပြင်မှာရှိတဲ့ ဆိပ်ခံတံတားတစ်ခုဖြစ်ပြီး မီးတောင် ဟောင်း ပုံစံယူ တည်ဆောက်ထားတာပါ။ စားသောက်ဆိုင်၊ ဟိုတယ်၊ ပြခန်း၊ ဖျော်ဖြေရေး အစီအစဉ်တွေနဲ့ လာရောက်သူတွေကို ဆွဲဆောင် လျက်ရှိပါတယ်။ ဥရောပ၊ လက်တင်နဲ့ ဟန်မင်းဆက် ဗိသုကာ လက်ရာတွေကို အပိုင်း ၃ပိုင်း ခွဲပြထားပါတယ်။ လှေဆိပ်လည်း ရှိတာကြောင့် လှပတဲ့ကမ်းခြေကို ရွက်လှေစီးရင်း ခံစားနိုင်ပါတယ်။

ဒါက တိုးရစ်စ်တွေ အများဆုံးသွားလေ့ရှိတဲ့နေရာ ၁၀ နေရာပါ။ ဒီနေရာ ၁၀ နေရာကို အလည်အပတ် သွားဖို့အတွက် တစ်ရက်တည်း အချိန်ပေးရင် လုံလောက်ပါတယ်။ ခြုံပြီး ပြောရရင် မကာအိုမြို့ဟာ သန့်ရှင်းလှပပြီး အစားအသောက် ကောင်းတွေရှိတဲ့၊ ရာသီဥတု ကောင်းမွန်တဲ့ နေချင်စရာ မြို့လေးတစ်မြို့ပါ။ အခက်အခဲ တစ်ခုကတော့ ဘာသာစကားပါပဲ။ အင်္ဂလိပ်စကားကို ထမင်းစားရေသောက်လောက် တောင် မပြောနိုင်ကြပါဘူး။ မသိလို့မေးရင်လည်း လက်ခါ၊ ခေါင်းခါပြီး ပြေးတော့တာပဲ။
ကျွန်မ ဈေးဝယ်တဲ့အခါ၊ ဆိုင်တွေမှာ စားတဲ့အခါ အင်္ဂလိပ်စကားပြောဖို့ မကြိုးစားတော့ဘဲ လက်ဟန်ခြေဟန်နဲ့ပဲ ပြောရတော့တယ်။
မကာအိုက အပြန်မှာတော့ နိုင်ငံခြားမသွားခင် ဆရာသမား ဆုံးမတဲ့စကားကို သတိရနေမိတယ်။
“နိုင်ငံခြားက ရုပ်ဝတ္ထု(လောကီ)တိုးတက်တယ်၊ တို့မြန်မာက လောကုတ္တရာတိုးတက်တယ်။ သူတို့က ခရီးသွားချင်(သံသရာလည်ချင်) တယ်။ တို့က သံသရာပြတ်ချင်တယ်။ သူတို့က အပြင်ကို လိုက်တယ်။ တို့က အတွင်း (ဟဒယ)ကို လိုက်တယ်။ ဒါကြောင့် မြန်မာဟာ ကမ္ဘာထက် လောကုတ္တရာ အရာမှာ သာတယ်။ ဟိုက လောကီ တိုးတက်မှုတွေကိုကြည့်ပြီး ကိုယ့်မြန်မာကို အထင်သေးတဲ့စိတ် ဝင်တတ်တယ်။ မြန်မာက မညံ့ပါဘူး။ မြန်မာကို အထင်မသေးနဲ့” တဲ့။
ဒီစကားနဲ့ ဒီဆောင်းပါးကို အဆုံးသတ်လိုက်ပါတယ်။
ချောစုထွေး